కృష్ణమ్మా వందనమమ్మా...

నమస్కారము 

కృష్ణవేణి యెట్లు కృశించెనిట్లని

అరసిజూచినంత ఆక్రమణలు 

హేతువంచు తేలె; హెక్టార్లు దోచిన 

దుష్టమూకనిపుడె దునుమవలయు 

కృష్ణమ్మ బిరబిరా పరుగులిడేదొకప్పుడు. ఇప్పుడు నీరు చాలాచోట్ల లేదంటే అది 'మనిషి' పనే!!

నదులనాక్రమించి నక్రాలు జేసెడు 

నీచులందరింక నీల్గవలయు;

దొంగచాటుగిసుక దోచెడు దుష్టుల 

తుక్కు చేతుమమ్మ తుంగభద్ర!

"మా ప్రాణాధారమైన ఓ తుంగభద్రమ్మా! ఇష్టారాజ్యంగా ఇసుక తోడేస్తున్న తోడేళ్ళను ఉపేక్షించమమ్మా.. వారిని తుక్కు తుక్కుగా చేస్తామమ్మా" అంటూ చైతన్యవంతులైన పరీవాహక ప్రాంత ప్రజలు/ విద్యార్థులు ప్రతిన పూనుతున్న సన్నివేశమిది. తప్పుచేసేవారిని ప్రజలు పట్టి రక్షకభటులకు అప్పగించాలి. దొంగల సమాచారాన్ని రక్షకభటులకు ప్రజలు చెప్పాలి. 

 16-8-16

సస్యసంపదిచ్చి సాకెడు కృష్ణమ్మ

ఋణము దీర్ప తరమె ఋత్వికులకు

నైన? (జీవకోటినైక్యపర్చు నదిది/)జనులనెల్ల ఐక్యపర్చు నదిది

భరతభూమికిదొక భాగ్యరేఖ

17-8-16

బక్కచిక్కె నేడు బహువిభవముల

నొసగు తల్లి కృష్ణ; నొప్పిలేదె

పాలకులకుగాని, పాలితులకుగాని

తల్లిబాధదీర్ప తరలిరారె (తరలిరండు)

అపార జలరాశితో విశాలముగా కన్పిస్తూ ప్రాణికోటికి జవజీవాలిస్తూ వుండిన కృష్ణమ్మ  .. నేడు మానవ తప్పిదాలతో కృశించి కనబడుతుంటే తమకేమీ పట్టనట్టు వుండరాదు. కబ్జాకోరుల ఆగడాలకు అంతం పలికి నదీమతల్లికి పూర్వవైభవము (/జలకళ) తీసుకురావడానికి మనమంతా ఉద్యుక్తం కావాలి. 

 

మరిన్ని పద్యాల కొరకు
http://padaayi.blogspot.in/p/blog-page_2.html

----

భవదీయ 
పద్యాల విక్రమ్ కుమార్  8500386163(సదా బి ఎస్ ఎన్ ఎల్)